Latvīšu volūdys agentura sadarbeibā ar Juri Cybuli i Lideju Leikumu ir izstruoduojuse pyrmū digitalū latgalīšu ābeci, kas jau 2014. goda majā byus pīejama vysim interesentim. Ābece ir papyldynuota ar dorba būrtneicu “Skreineite. Vuicūs raksteit” i uzziņu materialu pedagogim. Itys vuiceibu leidzekļu komplekts byus pīejams bez moksys Latvīšu volūdys agenturys sātys lopā valoda.lv
Jurs Cybuļs informej, ka 2014. godā aprit 246 godu nu laika, kod izdūta pyrmuo ābece latgalīšim ar nūsaukumu pūļu volūdā “Elementarz łotewski z abecadłem, krótkim katechizmem”.
Koč i piec 1934. goda 15. maja latgalīšu vuiceibu gruomotys tyka izjimtys nu školu bibliotekom i pat sadadzynuotys, vys vēļ 1937. godā Reigā apguodā “Grāmatu Zieds” izguoja Seimaņa Svennes ābecis “Mozō abece un pyrmō losomō grōmota mōjā un pyrmskūlā” 8. izdavums.
Padūmu varys godūs Latvejā nivīna latgalīšu ābece izdūta natyka.
1992. godā piec 55 godu puortraukuma apguodā “Lielvārds” izguoja jauna latgalīšu ābece (autori Jurs Cybuļs i Lideja Leikuma), kurā lītuota tai sauktuo Pītera Stroda pareizraksteiba, bet ar vairuokim jaunynuojumim.
Jaunuo latgalīšu ābece “Skreineite” ir klasiskuo tipa pyrmvuiceibys gruomota, kas paradzāta skaiteitvuiceišonai latgalīšu volūdā.
Tū var izmontuot vuicūt bārnu sātā, pyrmsškolā voi suokumškolys 1. klasē, tei paradzāta školānim, kas namuok skaiteit.
Ābece “Skreineite” sastateita piec analitiski sintetiskuos skaņu metodis. Latgalīšu ābecē pyrmais skaņu metodi lītuojs Fraņcs Kemps.
Jaunuos ābecis veiduošonā vārā jimti 2008. godā apstyprynuotī Latgalīšu raksteibys nūteikumi (Vaļsts volūdys centra Latvīšu volūdys ekspertu komisejis Latgalīšu ortografejis apakškomisejis lāmums Nr. 1).
Itei jaunuo ābece i raksteitvuiceišonys būrtneica “Vuicūs raksteit” školuotuojim i vacuokim pīduovoj īspiejis sagataveit školānu skaiteitprasmis apgiušonai, īpazeistynuot ar burtim, saskateit tūs dobā, izveiduot pošim, īvuiceit tūs vysupyrma skaiteit ziļbēs, vīgli skaitamūs vuordūs, bet piec tam ari nadaudz sarežgeituokūs vuordūs, eisūs teikumūs, vāluok ari saisteitūs tekstūs.
Dorbs ar ābeci laika ziņā nav nūteikts. Školuotuojs kotra burta vuiceišonai var veļteit tik daudz laika, cik vajadzeigs.
Vokur byus links, kur var aplyukuot jaunū ōbeci..
http://ldb.lv/skreineite_vl/#I
